ढुपा छेश्यीको अवसरमा ह्योल्मो समाज सेवा केन्द्रद्वारा आयोजित रक्तदान कार्यक्रम सम्पन्न

अन्य बौद्ध धर्मावलम्बीहरूको झैं, आदिवासी जनजाति ह्योल्मो समुदायले पनि यो पर्व हरेक वर्ष विविध कार्यक्रम र पूजा–पाठ सहित धुमधामले मनाउँदै आएको छ। तर यस वर्ष भने, विश्वभर फैलिएको कोभिड–१९ को महामारी तथा नेपाल सरकारद्वारा निर्धारित स्वास्थ्य मापदण्डअनुसार सीमित व्यक्तिहरूको उपस्थितिमा ढुपा छेश्यी मनाइएको ह्योल्मो समाज सेवा केन्द्रका अध्यक्ष ढापा दोर्जे लामा ह्योल्मोले जानकारी दिनुभयो। वर्षाको समयमा देशका विभिन्न भागमा आएको बाढी तथा पहिरोले जनधनको क्षति पुर्‍याएको र रगतको अभाव भएको अवस्थामा रक्तदान कार्यक्रम सञ्चालन गरी रगत उपलब्ध गराउनुजस्तो पुण्य कार्य अरू केही नहुने भएकाले कार्यक्रम आयोजना गरिएको संयोजक टासी दोङ्बा ह्योल्मोले बताउनुभयो।

साथै, कोभिड–१९ महामारीको समयमा हिल–नेपाल तथा ह्योल्मो सञ्चार समूहद्वारा राहत वितरण कार्यक्रमसमेत गरिएको जानकारी पनि दिनुभयो। कार्यक्रममा बौद्ध दर्शन प्रवर्द्धन तथा गुम्बा विकास समितिका अध्यक्ष श्री फुपु छेम्बे शेर्पा र बोधिसत्व विहार ताइवानका धर्मगुरु श्री हेइग्वाङ शीलाई ताम्रपत्रद्वारा सम्मान गरिएको थियो। त्यसैगरी, भोटेकोशी गाउँपालिकाका अध्यक्ष श्री राजकुमार पौडेललाई बाढीपीडितहरूको सहयोगार्थ ह्योल्मो गुम्बाका सल्लाहकार निमा लामा ह्योल्मोले सत्तर हजार रुपैयाँ र ह्योल्मो सञ्चार समूह तथा हिल–नेपालको तर्फबाट मास्क, स्यानिटाइजर, थर्मो गनजस्ता स्वास्थ्य सामग्रीहरू हस्तान्तरण गरिएको थियो। बोधिसत्व विहार ताइवानका धर्मगुरु श्री हेइग्वाङ शीले ह्योल्मो समाज सेवा केन्द्रका लागि नगद एक लाख रुपैयाँ प्रदान गर्नुका साथै कार्यक्रममा बुद्ध दर्शनसम्बन्धी प्रवचन पनि दिनुभएको थियो।